ياما في الفالنتاين مظاليم!

أعترف و أقر بأني يئست. . . إيوة يئست. . . من إيش؟ من إني أفهِّم أي شاب و رجل و شايب و طفل المهم أي ذكر سواء بشر أو من المخلوقات الأخرى قيمة عيد الحب و معناه بالنسبة للعرب.

دحين لحد يِهِب في وجهي و يقولي حرام و ما أعرف إيش! أقطع دراعي لو أحد فينا بيفكر في دين مسيح ولا يهود ولا قسيس ولا شي.

يا ناس يا عالم. . . حرام عليكم!!!

نحن شعب محروم من الحب و الحنان و المشاعر الطبيعية، مستخسرين فينا يوم في السنة نعبر فيه!

سيبوكم من التعبير طيب...

أنا و بإسم أغلب النساء و السيدات و البنات و الفتيات أقول. . .

هادا اليوم هوا اليوم اللي نفرح فيه أكتر شي لأن حتجينا كلمة حلوة من شخص عزيز، حيفاجئنا أحد بهدية ولا وردة ولا حتى حبة كتكات، بس في أحد حيفتكرنا و يعبرلنا لو بمسج عن حبهم و إخلاصهم.

بالنسبة للرجال: إيوة اليوم دا مهم حتى لو إنك ماتصدق في التعبير عن الحب. بما إنه في حياتك سيدة (أمك، أختك، زوجتك، بنتك) وقَّعت على عقد من يوم ولادتك إنك تعبرلهم بكل الطرق الممكنة عن حبك لهم! يعني لا تحاول. . المرأة مخلوقة من مشاعر و قلب! إفهم يا أخي!!

هادا لا يعني إن المحبة مقصورة على العلاقات بين الرجل و المرأة! يعني دحين مافي حب غير بين المتصاحبين و المتزوجين؟ الأصدقاء و الأخوان و الأخوات و العُمَّان و العمَّات و الخيلان و الخالات و كل فرد عزيز في حياتكم مايستاهل إنكم تقولولو شكرا لأنك في حياتي؟

"لا يكلف الحب شيئا" مقولة ما أعرف مين قالها و أظن أنا اللي أخترعتها... !
المهم. . . ترى ممكن تعبروا عن حبكم و اهتمامكم و مشاعركم بأبسط مايمكن و تكلفة قليلة أقرب إلى لا شيء.

عشان كده قررت أعطيكم أفكار بسيطة تعبروا فيها عن مشاعركم (رجال و نساء):

•  علبة كيك "بيتي كروكر" أو "العلالي" أو أي شي. . . و وردة أي لون من البياعين في الشارع.

الوقت: ساعة. الميزانية: 15 - 20 ريال

• ورق النوتات الملونة على شكل قلب (بوست إت) من مكتبة جرير و وردة أي لون.

 الوقت: عشر دقايق. الميزانية: 10 -15 ريال

• شوكولاته على شكل قلب من اي محل حلويات، في الدانوب في علبة حلوة. ورق نوتات ملون على شكل قلب.

الوقت: نص ساعة. الميزانية: 30 ريال اقصى حد

• دبدوب من محلات أبو ريالين.

الوقت: نص ساعة. الميزانية: ريالين.

• ورقة واحدة فقط لا غير أو حتى نص و قلم جاف. و اكتب كل كلمة حب و تقدير و احترام تعرفها و أنهيها بـ "هادا إحساسي ناحيتك"

الوقت: ساعتين عشان عبال ماتطلعوا بكلمتين عدلين. الميزانية: 4 ريال 5 ريال أقصى شي.

بالعربي مافي حجة ولا عذر ولا شي يمنع و إذا مو يوم الفالنتاين إختار يوم تاني يناسبك لكن أهم شي خصص يوم (و الكلام أكتر شي للرجال) البنات أعرفهم مايقصروا إلا إذا لقوا إنو مافي فايدة و ياما في الفالنتاين مـــــــــــظــــــــــــالــــــــــــيـــم!

كل حب و إنتو بخيــــــــــــــــــر