16 نوفمبر 2026

صارت سلامة الإنسان اختيار، مو واجب؟

قبل فترة قررت أجدّد معلوماتي وتدريبي في الإسعافات الأولية وإنعاش القلب، للاحتياط، وخاصة بعد ما شفت زحمة الشوارع اللي أعطتني تأكيد بنسبة ٨٠٪؜ إنّي لو احتجت الإسعاف يوم، لا سمح الله، حتقع الواقعة وهما لسه ما وصلوا بسبب الزحمة!

المهم…

قلت في نفسي: يا بنت، حوالينك كتير من الأقرباء والصاحبات اللي عايشين مع كبار في السن، فقلت لهم يسجّلوا معايا، وهنا كانت صدمة عمري…

الكل، بلا استثناء، اعتذر! والأسباب كالتالي:

  • لا، ما يمديني.
  • لا، غالية، ما تستاهل.
  • لا، ماني حق الأمور دي!

عاد السبب الأخير فعليًّا جلطني!

ما كنت مصدّقة قد إيش محد فاهم أهمية إنّه تكون عندك معرفة بالإسعافات الأولية في الزمن دا، وكمان مع الأوضاع الحالية.

ودا خلّاني أفكّر: طيب، هل دا يعني إنّه حتى أدوات السلامة الأساسية مو متوفرة عندهم؟

أقصد شنطة الإسعافات الأولية المتكاملة، وطفاية الحريق، وغيرها…

هل إحنا معتمدين على الهلال الأحمر ثقةً فيه، ولا استسهال وكسل؟

أيام زمان، كمان الناس في البلد ما اهتمّوا بالموضوع إلا أيام حرب الخليج. المدارس والشركات والمؤسسات كلها عملت دورات تدريبية للجميع على الإسعافات الأولية، وكيفية استخدام أقنعة الأكسجين…

مفهوم السلامة عندنا مشوّه!

وكمثال بسيط، القاعدة الاجتماعية العامة إنّه حزام الأمان في السيارة بس للمقاعد الأمامية، مو عشان السلامة… لا، عشان ساهر ما يعطيهم مخالفة!

والأسوأ إنّه الناس اللي في المقاعد الخلفية مو ضروري يربطوه!

متى صارت سلامة الإنسان اختيار؟


14 نوفمبر 2026

عدت و العود أحمد

اليوم قررت أخيراً أرجع أكتب.

عدى على آخر مرة كتبت هنا عشرة سنين بالتمام!

حاولت اتذكر أنا ليش وقفت؟ أسباب كتير جات في بالي، لكن للأمانة، في الوقت حالي شايفتها أسباب ماتستاهل اني أوقف عشانها!

كلها كانت شخصية، و لكن دي الأسباب هيا اللي كان المفروض أكتب بسببها.

المهم، اللي فات مات و الان رجعت…

أشكر أعز صديقاتي على دا، لأنها هيا اللي كانت ومازالت دائماً تدفني وتزن عليا اني أكتب.

من ضمن الأسباب اللي وقفت أكتب عشانها، اني كنت أبغى كل شي يكون بيرفكت وممتاز! ولا غلطة، ولأنه دا مستحيل، فضلت اني ما أكتب على اني أكتب شي ما أشوفه على مستوى يستحق النشر.

بس خلاص، قررت اني من الان حكتب وما حادقق على ايش و كيف حتشوفه الناس، المهم أكتب و أخرج اللي في راسي.

ان شاء الله حكتب و أنشر كل يوم، ولو كانت بس عبارة وحدة.

انتظروني!